Antoni Hopkins hələ də "Quzuların səssizliyi"ndə (Silence of the Lambs) Hannibal Lekteri oxuduğu "ən yaxşı rollardan biri" hesab edir.
Hafta.az-ın “Hollywood Reporter”a istinadən yazdığına görə, aktyor Conatan Demmenin 1991-ci ildə çəkdiyi filmdə Codi Fosterlə birlikdə rol alıb. Hopkins adamyeyən serial qatil roluna görə Ən Yaxşı Aktyor Oskarını qazanıb.
Mükafatlı aktyor “People” jurnalına film haqqında danışıb və Londonda M. Butterfli oyunu zamanı ilk dəfə ssenarini agentindən aldığını deyib. Hopkins həmçinin etiraf edib ki, o, əvvəlcə filmin başlığına görə uşaq hekayəsi olduğunu düşünüb. Amma ustad aktyorun meneceri ona deyib ki, ssenarini oxu, sonra qərar ver. “Mən də dedim ki, bu təklifdir? Cavab verdi ki, bu, Codi Fosterin oynadığı “Quzuların səssizliyi” adlı bir filmdir", - o deyib.
86 yaşlı aktyor olduğu teatrın geyim otağında ssenarini oxumağa başlayıb və yenidən bunun təklif olub-olmadığını soruşub.
Dedim: “Daha oxumayacağam, çünki bu, oxuduğum ən yaxşı rollardan biridir”.
Hopkins sonradan öyrənib ki, rejissor Demme onu rolda görmək istəyir. Demme Hopkinsin filmdə rol almasını o qədər istəyirdi ki, onu görmək üçün Nyu-Yorkdan Londona uçub.
O anları xatırlayan Hopkins, “Sonra çölə çıxdıq və nahar etdik” deyərək, rejissordan niyə onu rol üçün seçdiyini soruşduğunu açıqlayıb. “Sonra danışdıq, mən rolu necə oynayacağımı bilirdim. Bu rollara instinktim var. Əslində Lekteri başa düşürdüm. Onun sirrini və tənhalığını anlayırdım”, - o deyib.
“Quzuların səssizliyi” gənc FTB agenti Klaris Starlinqin qurbanlarının dərisini soyan azğın qatili tapmaq istəyərkən psixopatik həkim Hannibal Lekterlə yaxınlaşmasından bəhs edirdi.
14 fevral 1991-ci ildə nümayiş etdirilən "Quzuların səssizliyi" 19 milyon dollar büdcə ilə dünya üzrə 272,7 milyon dollar qazanaraq 1991-ci ilin ən çox gəlir gətirən 5-ci filmi oldu.
Ssenarisini Oskar mükafatçısı Ted Tallinin yazdığı filmdə baş rollarda Hopkins və Foster, həmçinin Skott Qlenn və Ted Levin çəkilib.
